Bel m'es quan vei chamjar lo senhoratge
Quelh vielh laissan als joves lor maisos,
E chacus pot laissar en son linhatge
Tans filhs que l’us puoscha esser pros.
Adoncs m'es vis quel segles renovel
Mielhs que per flor ni per chantar d'auzel.
E qui, domna ni senhor, vol chamjar
Vielh per jove, bes deu renovelar.
Per vielha tenh domna, puois qu’a pelatge,
Et es vielha quan chavalier non a.
Vielha la tenh, si de dos drutz s'apatge,
Et es vielha, si avols om lolh fa.
Vielha la tenh si ama dintz son chastel,
Et es vielha quan l’a ops de fachel.
Vielha la tenh, puois l'enoian joglar,
Et es vielha quan trop vuolha parlar.
Joves es domna que sap onrar paratge,
Et es joves per bos fachs, quan los fa.
Joves si te, quan a adrech coratge
E ves bon pretz avol mestier non a.
Joves si te, quan garda son corps bel,
Et es joves domna, quan bes chapdel.
Joves si te, quan noi chal divinar,
Qu'ab bel joven si gart de mal estar.
Joves es om que lo sieu ben engatge,
Et es joves quan es be sofrachos.
Per jovel tenh, quan prolh costan ostatge,
Et es joves, quan fa estragatz dos.
Joves, quan art s’archa ni son vaissel,
joves quan vol bastir cort e cembel.
Per jovel tenh, quan ben vuolha jogar,
Et es joves, quan sap ben domneiar.
Velhz es rics om, quan re no met en gatge
E li sobra blatz, e vis, e bacos.
Per vielh lo tenh, quan liura uous e fromatge
A jorn charnal, se e sos companhos.
Per vielh, quan vest chapa sobre mantel,
Per vielh, quan a chaval qu'om sieu apel.
Vielhs es, quan vol un jorn en patz estar,
E vielhs, quan pot gandir ses baratar.
Mon sirventesc port de vielh e novel
Arnautz joglars a Richart, quel chapdel;
E ja tesaur vielh no vuolh’amassar,
Qu'ab tesaur jove pot pretz gazanhar!
